Kryetari i Unionit të Bizneseve Shqiptare dhe Gjermane, Nazmi Viqa ka përmbyllë vitin 2020-të me një urim special drejtuar gjithë atyrë që pa hezitim kanë bashkëpunuar përgjatë vitit 2020 dhe shpreson bashkëpunim të ndërsjelltë edhe vitin e ardhshëm e më gjatë.
Ai ndër të tjera ka përmendur edhe bashkëpunëtorët më të ngushtë si GIZ-i gjerman dhe Ministrinë e Punës dhe Mirëqenies Sociale për aksionin e tyre në projekte gjigante, shkruan “Kosovarja”.
“Të nderuar anëtarë të Unionit të Bizneseve Shqiptare dhe Gjermane, Në shenjë respekti ndaj Unionit, për bashkëpunimin dhe besnikërinë e treguar edhe gjatë këtij viti të rëndë pandemie që kllaposi tërë globin dhe solli vështirësi të panumërta si nga ana sociale dhe ajo psikologjike për të gjithë ne, pranoni falënderimet dhe urimet tona më të sinqerta me rastin e festave të fundvitit.
Falënderojmë skajshmërisht partnerët e projektit të shkollimit profesional në Gjermani të nxënësve nga Kosova, siç janë GIZ-i gjerman dhe Ministria e Punës dhe Mirëqenies Sociale për kontributin e pakusht, dhënë realizimit dhe finalizimit të këtij projekti.
Një falënderim i veçantë po ashtu, u shkon të gjithë anëtarëve për mbështetje dhe gatishmëri në aksionin për ndihmë ndaj rajoneve të goditura nga tërmeti i fuqishëm në Shqipëri, të cilët nuk kursyen për asnjë çast gatishmërinë dhe solidaritetin e tyre.
Duke shprehur edhe njëherë konsideratën dhe falënderimet tona për ju, me shpresë që bashkëpunimi ynë i ndërsjellë të vazhdojë edhe më tutje, urojmë që Viti i Ri 2021, të jetë vit i shëndetit, mbarësisë dhe i lumturisë për ju dhe familjet tuaja. Gëzuar për shumë mote!
Respekt dhe mirënjohje, Nazmiu
