Një vaj ushqimor, i prodhuar në Serbi, ka rezultuar se nuk i plotëson kriteret për sasinë e produktit dhe Inspektorati i Tregut në Kosovë ka vendosur ta ndalojë shitjen e produktit e ta tërheqë nga tregu, ka bërë të ditur të premten Ministria e Industrisë.
Paparaci ka mësuar se vaji nga Serbia i cili është ndaluar sot nga Inspektorati i Tregut, është sjellë në Kosovë nga kompania e ish-zëvendëskryeministrit Ramiz Kelmendi. Bëhet fjalë për vajin Premium, i cili prodhohet në Serbi për kompaninë “Elkos Group”.
Gjatë ditës së sotme, Inspektorati i Tregut ia ka ndaluar një operatori ekonomik shitjen në Kosovë të një vaji ushqimor, të cilin e importonte nga Serbia.
Kështu tha të premten Ministria e Industrisë, Ndërmarrësisë dhe Tregtisë, përmes një komunikate për media.
“Inspektorati i Tregut në vazhdën e inspektimeve të intensifikuara ka kryer edhe inspektime lidhur me verifikimin e sasisë dhe peshës së produkteve nëpër operatorët ekonomik në Republikën e Kosovës. Për t’a hequr çdo dyshim lidhur me peshën dhe sasinë e produkteve mostrat janë dërguar në laborator për analiza përkatëse, pas të cilave ka rezultuar se një lloj i vajit ushqimor në treg nuk i plotëson kriteret”, thuhet në njoftim.
Tutje, MINT thotë se Inspektorati i Tregut në vazhdimësi kryen verifikime dhe inspektime në terren me qëllim të mbrojtjes së konsumatorit e po ashtu do të vazhdojë ta bëjë të njëjtën gjë edhe gjatë ditëve në vazhdim.