Xhelozia bëhet shumë shpesh shkaktar i dhunës që përjetojnë gratë në Kosovë nga partnerët e tyre apo edhe anëtarët e tjerë të familje. Një rast i tillë po dyshohet se ka ndodhur edhe dje në një familje në fshatin Terpezë e Ulët në Malishevë, ku viktimë është një 32-vjeçare, raporton Gazeta Sinjali.
Siç mëson Sinjali, rastin e ka denoncuar gruaja, e cila ka kërkuar ndihmë nga Policia, për shkak të dhunës së ushtruar nga bashkëshorti i saj.
Rasti dyshohet të ketë ndodhur në shtëpinë e tyre, ku i dyshuari e ka rrahur dhe i ka bërë presion bashkëshortes.
Burimet thonë se bazuar në dëshminë e viktimës, motivi lidhet me xhelozinë e të dyshuarit.
Përballë kësaj situate, viktima ka vendosur të raportojë rastin në Polici dhe si rezultat i denoncimit, njësitet policore kanë intervenuar.
Burri i dyshuar është arrestuar dhe është shoqëruar në stacion policor për intervistim, ndërsa i është sekuestruar edhe një armë që e posedonte pa leje.
Me urdhër të Prokurorit të Shtetit, i dyshuari është dërguar në mbajtje dhe ndaj tij është iniciuar rasti nën dyshimet për kryerjen e veprës penale ‘Dhunë në familje’.
