Ka kaluar më shumë se një vit nga Festivali i Këngës ku Elvana Gjata u pozicionua e dyta me këngën ‘’Me tana’’.
Deri më tani ajo nuk ka folur kurrë për këtë ngjarje artistike ku bindjet ishin të mëdha për fitoren e saj.
E ftuar në ‘’NIN’’ ajo foli për herë të pare për pritshmëritë e mëdha dhe zhgënjimin e tyre kur ajo nuk arriti të shpallet fituese.
“Pritshmëritë kanë qenë të mëdha dhe mua kjo më ka interesuar. Kjo është ajo për të cilën unë jetoj, që të jem favoritja e publikut gjithmonë, që njerëzit me festival, pa festival ta duan Elvanën dhe këngën e saj gjithmonë. Edhe pjesa e votimit nuk është ndonjë risi në festivalet shqiptare. Dua që publiku ta përqafojë këngën dhe ta mbajë përjetë me vete, aty është fitorja më e madhe, ai është çmimi më i madh dhe nuk janë gjëra klishe këto që po ju them”, është shprehur Elvana.
Më pas e pyetur nga moderatori Alaudin Hamiti nëse në festival ka pasur një dorë që ka ndërhyrë në radhitje, ajo tha se nuk kishte dijeni.
Por megjithëse përvojë jo e këndshme për të artistja ka thënë se kjo nuk do ta ndalojë që në të ardhmen të marrë pjesë sërish në gara të tilla muzikore.