Kryetari i Lidhjes Demokratike të Kosovës, Lumir Abdixhiku, në fjalimin e tij gjatë hapjes së Kuvendit të partisë, tha se këtë Kuvend e ka mbledhur vet, pa pritur që të bëhen zhurma apo të jepen ultimatume.
Ai deklaroi se nata e zgjedhjeve nuk ishte vetëm një rezultat politik, por pasqyrë e përpjekjeve, mundit dhe sakrificës së shumë njerëzve që pesë vitet e fundit panë si shembeshin përpara syve.
“Jemi mbledhur këtu në këtë Kuvend sepse kështu e kërkon përgjegjësia, kështu e kërkon LDK. Ky Kuvend nuk më është mbledhur nga dikush tjetër, e kam thirrur dhe mbledhur vet. Nuk kam pritur të bëhet zhurma dhe as të jepen ultimatume që u bëjnë gjithsesi.
Akti i parë i këtij obligimi moral është ballafaqimi me rezultatet, me pritjet, me anëtarësinë, me vetveten, mbi të gjitha me të ardhmen tonë”, tha ai.
“Më lejoni t’i heq të gjitha dyshimet dhe të them po: përgjegjësia është e imja. Dhe se po, vendimmarrja do t’u kthehet juve. Nuk lejoj askush tjetër të vendosë për fatin e LDK-së, përveç Kuvendit”, përfundoi Abdixhiku.
