Gjatë ditës së sotme në postën elektronike të Rektoratit të Universitetit të Prishtinës, arriti një kërcënim serioz, për çka edhe u njoftua Policia e Kosovës, raporton Gazeta Sinjali.
Mesazhi kërcënues ku bëhej fjalë për një shpërthim me bombë, bëri që njësiti Anti-drogë të dalë menjëherë në vendin e ngjarjes për të ndërmarrë të gjitha veprimet e nevojshme operative për parandalimin e më të keqes.
Policia bën të ditur përmes një komunikate, se pas kryerjes së kontrollit të vendit të ngjarjes, nuk kanë hasur në ndonjë mjet shpërthyes.
“Njësitet relevante policore, pas kryerjes së kontrollit të vendit të ngjarjes, nuk kanë hasur në ndonjë mjet shpërthyes. Të gjitha veprimet dhe hetimet e mëtejme do të ndërmerren në koordinim me organet e drejtësisë” thuhet në informacionin shtesë të Policisë.
Ndryshe, fillimisht lajmin për Sinjalin e ka konfirmuar edhe zëdhënësi i Policisë për rajonin e Prishtinës, Agron Borovci, i cili tha se informacionet e para flasin se kanosja e dyshimtë ka ardhur përmes postës elektronike.
Ndërsa lidhur me rastin rektori i Universitetit të Prishtinës, Naser Sahiti, ka deklaruar se kanë marrë një e-mail me kërcënimin për bombë.
“Kemi pranuar një e-mail anonim për një bombë, në siç e kanë shënuar ‘Hasan Prishtina’. Emaili ka ardhë në adresë të Rektoratit”, tha rektori.
