Është arrestuar edhe personi i dytë i dyshuar për kanosje ndaj gjinekologut Afrim Veliu në Prishtinë.
Ai është arrestuar dje, është bërë e ditur në raportin 24 orësh të Policisë së Kosovës.
“Më 03.06.2025 pas veprimeve hetimore lidhur me rastin është arrestuar edhe i dyshuari i dytë mashkull kosovar dhe i njëjti pas intervistimit me vendim të prokurorit është dërguar në mbajtje”, ka njoftuar policia
Gjinekologu Afrim Veliu u godit me një mjet metalik teksa po futej në veturë, në lagjen e tij në Ulpianë.
Përpos sulmit, në ordinancën e Veliut të dielën, u dyshua për mjet shpërthyes.
Për atë që kishte ndodhur kishte folur edhe vetë gjinekologu, i cili kishte deklaruar se sulmi nuk ndërlidhet me punën e tij dhe se nuk ka dyshim për ndonjë person apo për ndonjë çështje.
“Nuk i di motivet, për besë. Po më duket e rastësishme më shumë. Mirë jam shumë, super”, kishte deklaruar Veliu.
