Kur i tha Ganja Kurtit se je i vetmi kryeministër që nuk i flasin fëmija shqip në shtëpi, mu kujtua diskriminimi i fëmijëve kur i ndahen prindërit, shkruan “Kosovarja”.
Ganja e Drenicës, më e zëshmja dhe më e guximshmja në disa legjislatura të parlamentit të Kosovës, e ka bërë bërllok me Albin Kurtin kur ia përmendi vajzën, Lea.
Pse të merret ky shembull? A e di Ganimete Musliu se është rast i pashembullt të flet në parlament për një vajzë të vogël që ajo e përfshiu në politikë, për t’ia ofenduar vajzën kryeministrit?
Dhe, po e marrë një shembull për ta sqaruar këtë problem…
Qe ndarë një çift bashkëshortor në rrethin tim familjar dhe çka do që bënin kundër njëri-tjetrit, pësonte fëmija i tyre!
Kur ata mbusheshin xhelozi kur e shihnin njëri-tjetrin në qytet a në shoqëri, nga pamundësia të bënin diçka tjetër, nuk ia lenin fëmijën njëri-tjetrit!
Kur ishte fëmija te i ati, nëse ai e kishte parë nënën e fëmijës duke pirë kafe diku, nuk ia jepte atë, duke i thënë se ai nuk ishte kujdesur për fëmijën…
E, kur ajo e kishte fëmijën, njëjtë ia kthente ish-burrit…
Edhe Ganja, pasi i humbi zgjedhjet me partinë e saj, e preku Albin Kurtin në vajzën e tij. Dhe, kjo është për keqardhje.
Përtej kësaj, për keqardhje janë të gjitha manipulimet politike me fëmijët e deputetëve, të ministrave dhe kryeministrave.
Madje, edhe më e palejuar kur flasin për fëmijët e politikanëve a deputetëve që janë mbi 18 vjeç.
Kur ishte Fatmir Sejdiu president, qe hapur një diskutim për djalin e tij që punonte në “Vala 900” dhe pa fije turpi i patën bërë pyetje se si ndihej presidenti për të birin.
Ai, atëbotë, tha se djali i tij ishte i moshës madhore dhe ligji duhej të merrej me të nëse ai i kishte thyer ligjet që lidhen me punën.
Mediet janë marrë shumë edhe me djalin e presidentit Hashim Thaçi, por edhe në kohën kur ai ishte kryeministër e djali i tij ishte ende i mitur…
Prandaj, familja nuk duhet të diskutohet në parlament e as të jetë temë diskutimi…
Andaj, Ganja ka gabuar kur e ka zënë në gojë vajzën e Albin Kurtit në Parlament.
Dhe, nëse ajo nuk pajtohet me Kurtin politikisht, nuk do të thotë se duhet t’i revanshohesh në familje! Safet Krivaça /Kosovarja/
