Ditën e sotme, nën përkujdesjen e Ambasadës së Republikës së Kosovës në Kroaci, në qytetin e Sllavonski Brod u zbulua një pllakë përkujtimore në nderim të dhjetë viktimave që humbën jetën tragjikisht në aksidentin rrugor të 25 korrikut 2021.
Ceremonia u zhvillua në një atmosferë të mbushur me emocione, ku familjarët e viktimave u mblodhën për të nderuar kujtimin e më të dashurve të tyre. Pamjet e publikuara nga Ambasada e Kosovës në Zagreb tregojnë lot, dhimbje dhe homazhe pranë pllakës përkujtimore.
Në mesin e viktimave të kësaj tragjedie ishin edhe nëna dhe motra e Elijonës, ish-banores së Big Brother VIP Kosova. Në rrjetet sociale është shpërndarë një fotografi prekëse ku Elijona dhe vëllai i saj përqafohen pranë pllakës përkujtimore, duke kujtuar me mall familjarët e humbur.
Pllaka përkujtimore do të mbetet një simbol i respektit dhe kujtesës për dhjetë jetët që u shuan tragjikisht, ndërsa ceremonia e sotme riktheu emocionet dhe dhimbjen e një prej ngjarjeve më të rënda që preku shumë familje kosovare.
