Familjarët marrin trupat e terroristëve serbë të vrarë në Banjskë

Trupat e tre terroristëve serbë të vrarë në Bansjkë të Zveçanit iu dorëzuan sot familjarëve.

Në Institutin për Mjekësisë Ligjore në Prishtinë është bërë autopsia e trupave të tre serbëve të vrarë në sulmin e armatosur ndaj policisë së Kosovës më 24 shtator në Banjskë afër Zveçanit.

“Ajo që mund të them është se autopsia ka përfunduar. Identifikimi është çështje e prokurorisë. Raportet ende nuk janë kompletuar”, tha drejtori i Institutit të Mjekësisë Ligjore, Ditor Haliti.

Familjet e serbëve të vrarë raportohet se i tërhoqën trupat e të afërmve të tyre në orën 14:00. Policia e Kosovës ka qenë e vendosur afër vendit ku janë dorëzuar trupat.

Dy nga të vrarët do të varrosen nesër në Leposaviq, ndërsa tjetri do të varroset në Banjë të Serbisë.