Aktivisti i Partisë Socialdemokrate, Frashër Krasniqi, është lajmëruar në Facebook, pasi u arrestua nga Policia e Kosovës.
Ai ka publikuar në këtë rrjet social një fotografi nga momenti i arrestimit të tij, derisa ka shkruar për pagesën e rrymës në veri e UÇK’në.
“Për veriun 11 milionë. Për UÇK-në dosje, e për kundërshtarët politikë arrestime brutale. Qeveri e pabarazisë dhe autoritarizmit”, ka shkruar Krasniqi.
Ndryshe, Partia Socialdemokrate ka mbajtur sot aktivitet në oborrin e objektit të Qeverisë.
Zyrtarë të kësaj partie kanë hedhur ngjyrë të kuqe në drejtim të objektit të Qeverisë si dhe kanë vendosur mbishkrime “Gjakderdhje financiare”.
Zëdhënësja e kësaj partie, Natyra Kuqi ka konfirmuar se të arrestuar janë: Zgjim Hyseni, Nol Nushi, Frashër Krasniqi, Qëndrim Sahiti dhe disa të tjerë.
“Policia e Kosovës së bashku me Njësitin Special kanë sulmuar aktivistët e PSD-së, ku mbetën të arrestuar: Nol Nushi, Frasher Krasniqi, Zgjim Hyseni, Qendrim Sahiti dhe të tjerë. U sulmuam me gaz lotësjellës të gjithë që ishim aty”, ka thënë ajo për Express.