Policia holandeze gjeti një person i cili ishte fshehur në pjesën e rrotave të avionit që kishte udhëtuar nga Afrika e Jugut dhe kishte zbritur në aeroportin Schiphol të Amsterdamit
Udhëtimi nga Johannesburgu në Amsterdam kishte zgjatur 11 orë dhe avioni kishte bërë vetëm një ndalesë në Nairobi, Kenya.
Eshtë shumë e pazakontë që një person të mbijetojë në një fluturim kaq të gjatë, për shkak të të ftohtit dhe oksigjenit të ulët në lartësi të mëdha.
Mosha dhe kombësia e burrit nuk janë përcaktuar ende, thotë policia.
“Burri u gjet i gjallë në pjesën e rrotës së parme të avionit dhe u dërgua në spital në një gjendje të qëndrueshme”, tha zëdhënësja e Policisë Ushtarake Mbretërore Hollandeze, Joanna Helmonds për agjencinë e lajmeve AFP.
“Është mjaft e habitshme që burri është ende gjallë”, tha ajo.
Sipas transmetuesit holandez NOS, temperatura e trupit të burrit u ngrit dhe në kohën kur mbërriti një ambulancë, ai ishte në gjendje t’u përgjigjej pyetjeve themelore.
Ajo çfarë nuk dihet është nëse personi kishte hipur në aeroplan në Afrikën e Jugut apo Kenia.
