Ushtria izraelite ka njoftuar se armëpushimi në Gaza ka hyrë në fuqi, pas miratimit nga kabineti izraelit dhe pozicionimit të forcave në vijën e tërheqjes së dakorduar.
Në kuadër të marrëveshjes, Hamasi ka 72 orë kohë për t’ia dorëzuar Izraelit të gjithë pengjet që mbeten, të vdekura ose të gjalla. Ndërkohë, pritet lirimi i 1,950 të burgosurve palestinezë, sipas marrëveshjes ndërmjet palëve.
Radioja ushtarake izraelite raporton se 11 të burgosur të Hamasit do të lirohen menjëherë si pjesë e marrëveshjes së armëpushimit, raporton AP.
Një zëdhënës ushtarak paralajmëroi se është “shumë e rrezikshme” t’i afrohen pikës kufitare të Rafah dhe zonës së Boshtit të Filadelfias në jug. Për më tepër, forca mbrojtëse civile e drejtuar nga Hamasi ka bërë thirrje që banorët të qëndrojnë larg trupave të IDF derisa të përfundojë tërheqja.
