Udhëheqësi Suprem i Iranit, Ali Khamenei, dha një deklaratë të mërkurën gjatë një mesazhi televiziv, duke paralajmëruar Shtetet e Bashkuara për çdo veprim të mundshëm kundër vendit të tij.
“Nuk do të dorëzohemi,” garantoi fillimisht Khamenei, duke shtuar se Irani nuk do të kapitullonte dhe çdo sulm nga SHBA-të do të kishte pasoja serioze dhe të pariparueshme.
Khamenei u përgjigj gjithashtu ndaj kërcënimeve të presidentit Donald Trump, duke theksuar se ata që janë të njohur me historinë e Iranit e dinë se iranianët nuk i përgjigjen mirë kërcënimeve.
“Irani nuk do të pranojë as paqen dhe as luftën që i imponohet,” tha ai në vijim.
Udhëheqësi suprem iranian gjithashtu vlerësoi përgjigjen “të qetë, të guximshme dhe në kohë” të popullit iranian ndaj agresionit të fundit të Izraelit, duke e cilësuar atë si një shenjë të pjekurisë kombëtare dhe forcës shpirtërore.
“Kombi iranian do të vazhdojë të rezistojë me vendosmëri ndaj çdo lufte të imponuar dhe gjithashtu do të qëndrojë i fortë ndaj çdo paqeje të imponuar. Ky komb nuk do të dorëzohet kurrë para presionit,” theksoi Khamenei.
