Katër persona janë plagosur sot pas një përleshje në Komunën e Deçanit.
Të lënduarit janë dërguar për trajtim mjekësor në Spitalin e Pejës, nga ku dy nga të lënduarit janë dërguar për trajtim në Qendrën Klinike Universitare të Kosovës, për shkak të gjendjes më të rëndë shëndetësore.
Zëdhënësi i QKUK-së, Shpend Fazliu, ka treguar se ata janë jashtë rrezikut për jetën.
Sipas tij, ekipet shëndetësore janë duke kryer ekzaminimet e nevojshme.
“Ju konfirmojmë se dy persona janë duke marrë trajtim në Klinikën Emergjente në QKUK dhe momentalisht janë stabil jashtë rrezikut për jetë. Ekipet shëndetësore në QKUK janë duke kryer ekzaminimet e nevojshme”, ka thënë ai.
Rasti i përleshjes së sotme është konfirmuar edhe nga Policia e Kosovës në rajonin e Pejës.
Ata kanë bërë të ditur se kanë arrestuar dy persona.
Njëri nga ta është i moshës së mitur.
