Një realizim që prek temën e vrasjes së grave nga burrat, e që kohët e fundit është shumë e shpeshtë, është publikuar nga dyshja e grupit ‘wonderwaves’.
Shpat Morina dhe Bajram Kafu Kinolli kanë përdorë këngën e famshme të nusërisë që i këndohet vajzave në natën para martesës, e këtë këngë vajtimi ata e kanë përpunuar duke bërë një komentim emocional e të tendosur të marrëdhënieve martesore mes burrit e gruas, marrëdhënie këto të cilat dinë të jenë të pabarabarta e të dhunshme, sipas përshkrimit që i kanë bërë këngës dyshja.
Me këtë këngë ata kanë prekur veçanërisht mënyrën se si këto marrëdhënie të kobshme çojnë në vrasjen e grave nga “burrat zullumqarë”, ngjarje këto për të cilat kohët e fundit po dëgjojmë shumë shpesh.
Madje në një pjesë të këngës është përfshirë një vajtim i një nëne për vajzën e saj, ku thotë: “Gjithë o kanë e shtypne. Si ka shku te ai burrë kurrë s’o kanë e lirë, kurrë s’o kanë e knaqne. Kurrë, kurrë, kurrë. Gjithë me lot, gjithë e rrehne, gjithë e shane. Gjithë o kanë e gazepit. Gjithë.”
E pikërisht kjo ndodh me shumë vajza pas martesës, për shkak të mendësisë patriarkale që po mbizotëron akoma në shumë familje shqiptare.
