Konsulli Arjan Kashtanjeva i bënë bashkë personalitetet e njohura të biznesit

17 Shkurti i vitit 2008 shënon një nga datat më të rëndësishme të historisë së Kosovës dhe përmbyll sakrificën e shumë gjeneratave për liri e pavarësi.

Në përvjetorin e 13-të të shpalljes së Pavarësisë së Republikës së Kosovës, Konsullata e Përgjithshme e Republikës së Kosovës në Dyseldorf organizoi një takim virtual me personalitete të rëndësishme nga biznesi, shoqatat kulturore-artistike, shkolla shqipe, bota akademike dhe klubet sportive.

Në hyrje të takimit, Konsulli i Përgjithshëm Arjan Kashtanjeva falënderoi të pranishmit për pjesëmarrjen e tyre në këtë event shumë të rëndësishëm për shtetin tonë, duke potencuar faktin që gjendja momentale na ka pamundësuar një takim dhe një organizim të veçantë, që do të përkonte me datën 17-të dhe me rëndësinë e saj.

Gjatë fjalimit të tij, Konsulli i Përgjithshëm Arjan Kashtanjeva, u shprehë se në përvjetorët e Pavarësisë së vendit, kujtojmë jo vetëm ditën e lindjes së shtetit tonë, por njëkohësisht nderojmë edhe të gjithë ata që e bënë të mundur këtë ditë, brezat e tërë që e ndërtuan vizionin e Kosovës së Pavarur. Përkulje dhe përjetësisht mirënjohës ndaj dëshmorëve, invalidëve dhe veteranëve të UÇK-së.

Gjithashtu KP Kashtanjeva falënderoj mërgatën për kontributin e tyre të dhënë për Kosovën në të gjitha proceset, si dhe aleatët tanë ndërkombëtar për mbështetjen e vazhdueshme në krye me SHBA-të, NATO BE etj. Diaspora janë ambasadorët më të mirë dhe integrimi i tyre na bënë të ndihemi krenar, ku kemi shumë profesionist të fushave të ndryshme, afarist të suksesshëm, artist e sportist. Kosova gjatë këtyre viteve ka bërë një progres evident në të gjitha fushat, duke forcuar subjektivitetin ndërkombëtar dhe duke krijuar institucione demokratike brenda Kosovës, dëshmi më e mirë e kësaj janë edhe zgjedhjet e fundit të cilat ishin të lira, demokratike dhe nuk është shënuar as një incident, që janë shembull jo vetëm për rajonin por edhe për vendet të BE-së dhe më gjerë.

Të pranishëm në këtë takim virtual ishin: z. Nazmi Viqa –Kryetar i Unionit të Bizneseve (UB) në Gjermani, z. Gani Nuha – Nënkryetar i UB, z. Sami Thaçi- Mësues dhe kryetar i KASH-it,z. Besnik Kelmendi- CDU dhe anëtar i Këshillit për Integrim, z. Rrahman Islami – Shoqata Velbert dhe anëtar i Këshillit Integrues, z. Jusuf Jusufi – Kryetar i Bashkësisë Shqiptare në Gjermani, z. Bahri Cani nga Deutsche Welle, znj. Lindita Kryeziu dhe Fitore Berisha nga Shoqata e Gruas Dora d`Istria, z. Pal Sokoli – Shoqata e Shkrimtarëve Shqiptar në Gjermani, znj. Etleva Gerbi – Shkolla Shqipe Euskirchen, z. Herkul Ibrahimi- Shoqata “Nexhmije Pagarusha” Solingen, z. Fikret Ademi – Shoqata Shqiptare Gjermane në Münsterland dhe z. Bekim Beqiri- FC Kastrioti Stückenbruck.

Të gjithë pjesëmarrësit, përgëzuan Konsullatën për organizimin e këtij takimi virtual, i cili zgjati mbi 2 orë dhe ishte interaktiv, ku secili nga të pranishmit patën rastin të urojnë për 13 vjetorin, të flasin fillimisht për punën dhe aktivitetet e tyre, për bashkëpunimin e shkëlqyeshëm dhe mbështetjen e vazhdueshme që ju është ofruar që nga hapja e Konsullatës së Përgjithshme në Dyseldorf. Bashkëpunimi i gjithanshëm me Konsullatën u vlerësua lartë, e sidomos kur tani jemi në kohë pandemie, Konsullata ka vazhduar të ofroj shërbime dhe të jetë në shërbim të qytetarëve. Të pranishmit konkretisht falënderuan KP Kashtanjeva dhe të gjithë stafin, për punën e mrekullueshme që po bëjnë si dhe për përfaqësimin dinjitoz të RKS-ës dhe se krahas përvojave të tyre kanë dëgjuar vlerësime të larta për Konsullatën nga mërgata, autoritet gjermane dhe zyrat e ndryshme juridike.

Edhe Konsulli Kenan Islami dhe Zv.Konsullja Arta Selimi, në adresimet e tyre shprehën se janë të hapur për bashkëpunime, ku posa të normalizohet situata do të fillojnë me funksionalizimin e planeve dhe projekteve të ndryshme, ku Zv.Konsullja Selimi vlerësoi lartë sidomos aktivitetet e Shoqatës së Gruas Shqiptare „DORA D‘ISTRIA“, të cilat po bëjnë një punë të mrekullueshme dhe se projektet e përbashkëta do të kenë qendër padyshim vetëm suksesin.

Të pranishmit e vlerësuan lartë takimin edhe pse virtual, pasi ishte një mundësi e mirë e njohës me njeri tjetrin, me sfidat që ka shkaktuar Pandemia COVID-19 por gjithsesi edhe me punën dhe sukseset mërgatës.

Arjan Kashtanjeva