Kryeministri i Kosovës, Albin Kurti, ka dhënë sot një lajm të madh nga Gjilani, duke konfirmuar se Kosova ka nisur zyrtarisht prodhimin e dronëve vendorë, përfshirë ata ushtarakë.
Përmes një postimi në rrjetet sociale, kreu i qeverisë njoftoi se industria e mbrojtjes po avancon me shpejtësi.
“Të ardhmen e industrisë së mbrojtjes dhe avancimit luftarak po e ndërtojmë e zhvillojmë edhe në Kosovë. Shteti ynë po shndërrohet në vend që prodhon,” shkroi Kurti.
Bashkë me kryetarin e Gjilanit, Alban Hyseni, ai vizitoi kompanitë “Future Minds Academy” dhe “MIGA SkyShield MAR”, të cilat po prodhojnë dronin ushtarak “Skifteri” dhe dronin kamikaz “K1”.
Duke përdorur frazën “Made in Gjilan” përveç “Made in Kosova”, Kurti zbuloi edhe detaje teknike impresionuese për pajisjet e reja:
* Droni kamikaz “K1”: Arrin shpejtësi maksimale 180km/h dhe fluturon në lartësi deri në 2500 metra.
* Droni ushtarak “Skifteri”: Ka një hapësirë operuese prej 20km dhe arrin shpejtësi deri në 270km/h.
Kryeministri theksoi se ky prodhim vendor vjen krahas blerjeve të rëndësishme ndërkombëtare, si dronët Bayraktar TB-2 dhe dronët kamikazë Skydagger.
“Tash dronët luftarakë po i prodhojmë edhe vetë. Si qeveri, edhe në nivel qendror edhe lokal, do ta mbështesim dhe përkrahim ngritjen e kapaciteteve prodhimtarisë, gjersa nuk do t’i ndalim investimet për mbrojtje e siguri,” përfundoi Kurti.
