Vjosa Osmani, ushtruese e detyrës së Presidentit të Kosovës, ka bërë shkelje kushtetuese me shkuarjen në Veri të Kosovës me Albin Kurtin, shkruan “Kosovarja”.
Vjosa Osmani, menjëherë pas dorëheqjes së Hashim Thaçit nga pozita e Presidentit të Kosovës, zbarkoi me shpejtësi në zyrën e ish-presidentit të Kosovës, Hashim Thaçit.
Por, ajo po i renditë gabimet që janë shkelje kushtetuese. Para ca ditësh e kërcënoi kryetaren e KQZ-së, Valdete Dakën, me shkarkim nëse ajo do e mbronte certifikimin e kandidatëve për deputetë, konform ligjit në fuqi se nuk mund të certifikohet askush që është i dënuar në tri vitet e fundit.
Andaj, ajo, në vend se t’i jepte mbështetje Kushtetutës, e shkeli atë, duke u rreshtuar padrejtësisht krah Kurtit.
Shkelje tjetër kushtetuese bëri me shkuarjen në Veri të Mitrovicës me Albin Kurtin, për punë fushate parazgjedhore!
Vjosa Osmani mund të shkonte në Veri të Kosovës në cilësinë e Presidentes së Kosovës, në mënyrë protokollare, e jo në fushata partiake.
Presidenca mund ta njoftonte hierarkinë e sigurisë që t’i krijonte kushte zonjës Osmani për vizitë në Veri, në cilësinë e figurës unifikuese, sikur e precizon Kushtetuta.
Ajo, në një kohë, dinte ta komentonte Kushtetutën për rolin e Presidentit të Kosovës, Hashim Thaçi, duke e kritikuar për mos unitet kombëtar!
Ndërkaq, tash, kur edhe e kryen detyrën e Presidentit, shihet me Kurtin në eskorta të partisë “Vetëvendosje” për të bërë fushatë nëpër Kosovë!
Shtrohet pyetja: Kujt po i shërben Vjosa Osmani -Kushtetutës, që e obligon të jetë figurë unifikuese, apo “Vetëvendosjes”?
E drejta e saj është të përcaktohet politikisht, por nuk është e drejtë të bëjë fushatë për asnjë subjekt politik, sa është në pozitën e presidentes së shtetit.
Sepse, dëmi i shtetit, me një figurë të tillë presidenciale, është shumë i madh. Diplomacia ndërkombëtare që vepron në Kosovë, me siguri, e shohin nivelin e papërgjegjshëm të presidentes, e cila po i radhitë shkeljet kushtetuese njërën pas tjetrës…
E, gabimi më i rëndë i Presidentes ka ndodhur dje, në ditën e vendosjes së marrëdhënieve diplomatike me Izraelin, i cili zyrtarizoi njohjen e shtetit të Republikës së Kosovës, pa pjesëmarrjen e saj në aktet e ceremonisë së nënshkrimeve, që zakonisht njihen si akte solemne. Safet Krivaça /Kosovarja/