S’ka ditë të mos thuhet nga deputetë e oponentë politikë se Albin Kurti e ka mashtruar popullin gjatë fushatës parazgjedhore. Dhe, këtë po e përsërisin çdo ditë! Pra, deri kur kështu? – shkruan “Kosovarja”.
Kryeministri i Kosovës, Albin Kurti, i ka fituar zgjedhjet dhe ai duhet lënë i lirë ta bëjë punën për të cilën edhe ka fituar bindshëm.
Qeveria “Kurti 2” akoma nuk i ka bërë 100 ditë punë, e që, siç ndodh zakonisht, jepet një vlerësim për 100 ditshin.
Kurti ka bërë premtime gjatë fushatës si gjithë kryeministrat e deritashëm dhe asgjë më shumë se të tjerët para tij…
Por, edhe gjatë fushatës parazgjedhore është ditur fare mirë se Kurti flet ndryshe e vepron ndryshe…
Sidoqoftë, në politikën e jashtme Albin Kurti, deri më tash, ka qenë në nivel të duhur para bashkësisë ndërkombëtare.
Dje tha pa hezitim: “Franca nuk dha zotim për t’i hequr vizat”! Pra, mjafton që nuk tha si të tjerët para tij se Franca u pajtua…
Në politikën e jashtme, ku Kosovës i intereson zgjidhja e problemit me Serbinë, treshja: Kurti-Osmani-Konjufca, po dëshmojnë lidership ndryshe ndaj BE-së.
Në raport me asociacionin, Kurti po mban qëndrim në favor të mosformimit të tij dhe kështu duhet të veprojë deri në fund.
Sidoqoftë, Kurti do e ketë kokën në gërshërë në të dy mënyrat: Po e lejoi asociacionin do e dënojë populli, e po se formoi do e ndëshkojë BE-ja!
Megjithatë, Kurtin duhet lënë të lirë ta kryejë punën e kryeministrit, edhe pse brenda Kosovës nuk ka bërë asgjë pos shkarkim-emërimit nëpër borde e komisione.
E, kur flasim për shkarkim-emërimet, diku ka të drejtë, e diku duhet ta bëjë punën me më shumë transparencë dhe përgjegjësi ligjore… Safet Krivaça /Kosovarja/