MEDVEGJË
I them lapsit,
Mos thur ngjyrën,
Rrjetën mos harko,
Të jap zërin,
Të jap frymën,
Bubulimin që rënkon,
Gjoksin e maleve,
Aromën e fushës,
Heshtjen e Drenushës,
Ti jap sytë e Dardanisë,
U verbuan,
Nuk shohin më dritë,
Më shiko,
Më dëgjo,
Jam gjëma e përvëluar,
Shekujve,
Buzëqeshje e ndaluar,
Burgjeve,
Lulëkuqja e vyshkur,
Kokulur qëndisë,
Nga agimet e ngrysura,
Në heshtje pëshpërit,
Llambën e zjarrtë në grushte,
Një copëz etje mbaj,
Sytë drejt lindjes,
Diellin e Medvegjës kërkoj…!
Rrugën e kombit harruat,
Ajo ka emër Dardani,
Mos harroni fjalën e të parëve,
Medvegja është ILIRI!
Mos e lerë të ik,
Mos e lerë të qaj,
Foshnjën e njom në djepin e saj,
Do ju mallkoj një ditë,
Histori e gjallë,
Po ju rrëshqet nga duart,
Trungu shqiptar,
Mos i mbyll sytë,
Para grushtit me zjarr,
Do ju mallkoj një ditë,
Loti shqiptar,
Medvegja po thërret,
Jo, nuk jam vet…!
Linda SHAQIRI
