Presidenti i Bjellorusisë, Alexander Lukashenko, ka thënë se SHBA-ja po e shtyn Evropën në luftë me Rusinë në territorin e Ukrainës dhe se Washingtoni po nxit luftë në Kosovë.
“Shtetet e Bashkuara po e shtyjnë Evropën në një konfrontim ushtarak me Rusinë në territorin e Ukrainës. Ata nuk i fshehin planet e tyre. Kontratat tashmë janë lidhur për vitet e ardhshme. Do të thotë, Ukraina do të shkatërrohet. Dhe qëllimi është të dobësohet Rusia dhe të shkatërrohet Bjellorusia”, tha Lukashenko në fjalimin e tij në Forumin patriotik kushtuar Ditës së Unitetit Kombëtar.
Ai shtoi se në të gjitha këto veprime ka edhe një qëllim tjetër – Evropën.“Amerika është i vetmi vend që përfiton nga ajo që po ndodh këtu: të vendosë Evropën në vendin e saj dhe të largojë konkurrentët e saj.
Sot Ukraina, nesër do të jetë Moldavia ose shtetet baltike, Polonia ose Rumania. SHBA-ja po ndez luftën në Kosovë, duke u përpjekur të ushtrojë presion mbi Serbinë, të nxisë mosmarrëveshjet në Karabak, të turbullojë ujërat në Siri.
Jo gjithçka është e thjeshtë as në Afganistan, as në vendet fqinje. Washingtoni është i pranishëm në të gjitha konfliktet e rëndësishme politike”, tha Lukashenko.
