Padyshim që Italia është atdheu i makaronave. Spaghetti-it e famshme me shijen e tyre tunduese kanë magjepsur gjithë botën. E sigurisht, të gjithë jemi dakord me këtë fakt.
Por fantazia dhe mjeshtëria në kuzhinë i lë gjithmonë një shteg të hapur sfidës.
Receta shqiptare, e përkryer e shpagetave me kima është rasti tipik kur shijet e kulinarisë së shteteve të ndryshme sfidojnë njëra-tjetrën.
Shumë vite më parë, përgatitja e shpagetave me kima nga amvisat shqiptare sidomos gjatë periudhës së komunizmit dëshmonte mirëqenie.
Ky gatim special ishte ndër më të mirat që ofronin restorantet e asaj kohe, traditë që vijon edhe sot, megjithëse e kombinuar dhe e ndërthurur me recetat italiane.
Shpageta me kima kanë një shije të plotë dhe kombinohen në mënyrë të shkëlqyer me sallatat e freskëta të stinës sidomos sallatat jeshile, spinaq apo rukola.
AgroWeb.org u sugjeron recetën e vjetër të traditës shqiptare të shpagetave me kima, një mënyrë fantastike për ta përgatitur për gjithë familjen.
Përgatitja e Shpageta me Kima në Shtëpi
Përbërësit
Një pako Shpageta të gjata
400 gramë mish të grirë
4-5 kokrra domate të pjekura mirë
Një karrotë
Një kokërr qepë
Një thelpi hudhër
Gjysmë gotë me verë të kuqe (sipas preferencës)
Vaj ulliri
Kripë
Piper
Majdanoz
Djathë kaçkavall i grirë
Përgatitja
Në një tigan të thellë shtojmë vajin e ullirit, qepën e grirë hollë dhe karrotat e grira në kubikë të vegjël.
I kaurdisim derisa të zbuten. Shtojmë hudhrën e grirë hollë bashkë me mishin e grirë dhe vijojmë t’i kaurdisim. Më pas i shuajmë me pak verë të kuqe dhe e lëmë derisa të avullojë. Më pas shtojmë domatet e grira në rende si salcë, shtojmë kripën dhe piperin. I kaurdisim për pak dhe shtojmë 1-2 gota ujë dhe i lëmë të zjejmë derisa salca të bëhet e trashë.
Ndërkohë, në një tenxhere hedhim ujë, kripë dhe disa pika vaj ulliri dhe e vendosim në zjarr që të zjejë.
Në momentin që uji nis të zjejë hedhim makaronat dhe i lëmë të zjejnë për 8-9 minuta.
I heqim nga zjarri, i kalojmë në kullorëse dhe i bashkojmë me salcën e përgatitur.
I shërbejmë të ngrohta dhe i spërkasim sipër me djathë kaçkavall të grirë.
