Se gjërat nuk janë mirë në PDK, dëshmojnë edhe shumë procese që kanë filluar para zgjedhjeve të 14 shkurtit, shkruan “Kosovarja”.
Për të parën herë në PDK, bosi i kësaj partie, Xhavit Haliti, ka votuar në anën e kundërt të partisë gjatë votimit të kryetarit të Kuvendit të Kosovës.
Pastaj, deputetja më e re e legjislaturës aktuale të Kuvendit të Republikës së Kosovës, Adelina Grainca, dezertoi nga PDK-ja dhe kaloi te Kurti, për t’ia bërë kuorumin presidentes.
Komentet e djeshme në medie kanë qenë në gjurmë të informacioneve se Adelina Grainca ka kaluar në “Vetëvendosje”, në këmbim të interesave personale dhe për biznese familjare, e që lidhen me ndërtimet e larta në Ferizaj.
Ndërkaq, kumtesa zyrtare e PDK-së ka evidencuar deklaratën: “Adelina Grainca ka kaluar në “Vetëvendosje për para të majme!”.
Por, pa marrë parasysh lëvizjet që kanë ndodhur, treguesi është se gjendja në PDK kurrë nuk ka qenë më e keqe.
Votimi i Xhavit Halitit, ndryshe nga partia, si dhe dezertimi i deputetes Adelina Grainca nga partia ku i mori votat për deputete, nxjerrin mbi tavolinë nevojën për ndryshime në këtë parti.
E, sa i përket Xhavit Halitit, dihet botërisht se votimin ndryshe nga partia, e ka bërë nën ndikimin e nervozës, por deklaratat e tij për këtë gjest flasin shumë për marrëdhëniet në këtë parti.
Por, krahas Xhavit Halitit, në PDK nuk është vetëm Adelina Grainca, dezertorja e PDK-së që ka tradhtuar votat elektorale, të cilat janë lypur më shumë në komunën e Lipjanit sesa në Ferizaj, nga edhe ka qenë e deleguar.
Në Gadime të Lipjanit është lypur vota shtëpi më shtëpi për Adelina Graincën, ashtu sikur kanë kërkuar edhe Elmi Reçica me disa kandidatë të preferuar nga Enver Hoxhaj.
Gjendje e keqe me kandidatët për deputetë ka qenë edhe në Lipjan, ku janë lejuar të garojnë kandidatë të komprometuar dhe pa bagazh politik.
Sepse, ushtruesi i detyrës së kryetarit të PDK-së, Enver Hoxhaj, ka krijuar tollovi në të gjitha degët e kësaj partie në terren, duke shkaktuar huti dhe zemërim për kandidatët e dominuar nga degët dhe vetë ai me një grup njerëzish, e që PDK-në e kanë shfrytëzuar për biznese të veta.
Janë eliminuar nga kandidatura kandidatët më të përgatitur, e që kanë peshuar në popull, që kanë pasur respekt e simpati, kurse janë lejuar të garojnë kandidatët që sot kalojnë te partitë tjera, në këmbim të interesave personale!
Sidoqoftë, në PDK-në e Hashim Thaçit e të Kadri Veselit nuk kanë ndodhur këto lojëra të pista.
Megjithatë, lëvizje të deputetëve nga një parti në tjetrën ka pasur edhe më parë, por jo edhe haptas e para kamerave në sallën e Kuvendit të Kosovës, siç po ndodhë tash.
Andaj, në PDK duhet të bëhen reforma të brendshme, e Enver Hoxhaj, si u.d. i kryetarit të PDK-së, për të gjitha dështimet që ndodhën duhet të ofrojë dorëheqje të parevokueshme.
Sepse, nuk mjaftojnë vetëm deklaratat e tij për dështimet në parti… Safet Krivaça /Kosovarja/