Genc Kelmendi, mjek shqiptar në Shtutgart të Gjermanisë, bëri thirrje që të mos ketë panik nga koronavirusi, ngase sipas tij, ai nuk shkakton vdekje te njerëzit e shëndosh, dhe shkalla e vdekshmërisë prej tij është e ulët.
Në një lidhje të drejtpërdrejtë me studion e “Ditari” në A2, ai theksoi se “Covid-19 nuk duhet të dramatizohet”.
“Vdekshmëria nga koronavirusi është shumë e ulët. Rreth 5% sëmuren rëndë dhe vetëm 1% vdesin. Për njerëzit e shëndoshë nuk është katastrofë. Është një ftohje e zakonshme. Personat mbi 80 vjeç, që kanë sëmundje kronike, janë viktimat. Një person mbi 80 vjeç, që nuk ka probleme shëndetësore, e kalon pa problem”, tha mjeku.
Kelmendi thotë se asnjë pacient në Gjermani nuk ka vdekur nëse nuk ka pasur ndonjë sëmundje përcjellëse.
“Çështja e Covid19 nuk duhet dramatizuar, ashtu siç po dramatizohet në Shqipëri dhe Kosovë. Duhet bërë e qartë se vdekshmëria nga Covid19 është shumë e ulët. Edhe nëse virusi do ta infektonte të gjithë popullsinë, vetëm 5% do të smureshin rëndë, ndërsa vdekshmëria do të ishte vetëm 1%. Por nuk paraqet problem për njerëzit e shëndosh. Asnjë pacient nuk ka vdekur te ne, nëse ai nuk ka pasur sëmundje përcjellëse. Mbi 95% e njerëzve të shëndosh nuk e kanë problem këtë virus, është një ftohje e zakonshme, dhe nuk duhet dramatizuar”, ka thënë ai.
Kur e ka krasasuar coronavirusin me gripin sezonal, mjeku Kelmendi ka thënë se në Gjermani vetë gjatë dimrit të vitit 2019, 7 mijë e 800 persona kanë vdekur nga gripi i zakonshëm.
Ai thotë se shumë shpejtë jeta duhet të i rikthehet normalitetit, dhe duhet shikuar nga e ardhmja, pasi është shumë e rëndësishme për ekonomitë, shkollat dhe të tjerat, që jeta të vazhdojë.
