Kryetari i LDK’së, Isa Mustafa, ka thënë se nuk i lexon komentet e ndjekësve të tij në Facebook, por megjithatë, ai thotë se e ka parë një video ku ai duket që ka vdekur e po varroset. Ai thotë se një anëtare e familjes së tij e ka parë po ashtu dhe ka menduar se është e vërtetë.
“Motra ime e pa një video që njerëzit kanë shkuar tek varri im e kanë mbajtur fjalime aty e gati i ka rënë të fikët. Ajo u ka thënë të tjerëve pse nuk më tregoni që ka vdekur vëllai im. Jemi në një kohë kur njerëzit po vdesin dhe po varrosen po u bërë e madhe shumë. Kam kontaktuar me policinë dhe me sektorin për krimet kibernetike, ata po merren me të”, thotë ai.
Ai nuk fajëson askënd për videon e qarkulluar në rrjete sociale.
“Nuk mund të ja lë askujt. Kam pasur kërcënime nga militantët e VV’së. Por nuk dua të futem në akuza. Janë pamje brutale dhe kanë asgjë me pamjen e njeriut. Me logjikën. Ai që e ka bërë duhet të jetë i degjeneruar edhe nga pikëpamja njerëzor”, përfundon ai në RTK.
