Ka ndërruar jetë në moshën 98 vjeçare prezantuesi më i njohur i radios në botë Reinaldo Maria Cordeiro.
Sipas medieve të huaja, ai ishte cilësuar nga Guinness në vitin 2000 si më i qëndrueshmi në punën e tij prej më shumë se 7 dekadash në transmetim.
Fansat e quanin “Uncle Ray” dhe admironin tek ai rrymën muzikore që ai e përcillte tek të gjithë brezat dhe intervistat interesante. Cordeiro vdiq të premten në Hong Kong, i rrethuar nga familja dhe miqtë, të cilët kënduan “You’ll Never Walk Alone”, si lamtumirë, tha një komitet që organizoi funeralin e tij.
Cordeiro kishte punuar në pjesën më të madhe të viteve në radion më të famshme të Hong Kong-ut dhe kishte intervistuar shumë ikona të muzikës pop si: Beatles, Bee Gees, Ella Fitzgerald dhe Frank Sinatra. Mësohet se miqtë dhe të afërm i dhanë lamtumirën duke i kënduar “You’ll Never Walk Alone” gjatë ceremonisë funerale.
I lindur në Hong Kong në vitin 1924, Cordeiro ishte i pesti nga gjashtë fëmijët në një familje me prejardhje nga emigrantët portugezë.
Ai punoi si drejtor burgu dhe nëpunës banke përpara se t’i futej muzikës dhe transmetimit, ndërsa shfaqja e tij e parë u dha në Radio Rediffusion në 1949. Programi i tij në orët e vona të natës i quajtur “All The Way With Ray” filloi në vitin 1970 dhe u bë emisioni radiofonik më i suksesshëm i stacionit.
Ai thuhet se kishte probleme me zemrën gjatë viteve të fundit dhe u shtrua në spital janarin e kaluar pasi pësoi një goditje në tru.
