Në Kosovë ka krim ekonomik. Ky konstatim del nga të gjitha raportet e progresit të BE-së për Kosovën, shkruan “Kosovarja”.
Se ka korrupsion dhe krim ekonomik, e që vjen nga politika, është edhe vlerësim i BE-së që po e shtynë liberalizimin e vizave, sado që këtu kriteret janë përmbushur.
E, se ka krim ekonomik dhe korrupsion në Kosovë, e di edhe populli…
Ndërkaq, nëse ka të atillë që hamenden, mendojeni vjedhjen në dhomën e dëshmive në objektin e policisë në Prishtinë?!
Mendojeni vjedhjen që pat ndodhur, po ashtu, në Pejë, ku ishin ruajtur ari dhe gjërat e tjera me vlerë?!
Dhe, kush ka dhënë përgjegjësi për ato hajni deri më tash, edhe pse kanë kaluar vite e vite?
Mirëpo, edhe nëse kamerat nuk kanë regjistruar asgjë nga ato vjedhje, e edhe nëse hetuesia profesionale policore-juridike me prokurorë nuk kanë ndezur, a është dashur, madje, dikush, në shenjë përgjegjësie, të jep dorëheqje?
Pa dyshim, po. Madje, jo një dorëheqje, por disa sosh. Mirëpo, askush nuk e ka bërë një gjë të tillë!
Sepse, në Kosovë, si askund tjetër në botë, nuk ekziston dorëheqja në shenjë faji, gabimi, apo lëshimi…
Pra, s’ka dorëheqje as kur bëhen hajni skandaloze! E, strukturat udhëheqëse mbeten po të njëjtit që ta vazhdojnë punën për të mos u zbuluar asgjë, apo për t’u penguar hetimet dhe zbulimet.
E, në shtetet ku funksionin drejtësia, presidenti, kryeministri, ministrat japin dorëheqje qoftë edhe për një dhuratë të thjeshtë, qoftë ajo edhe simbolike.
Ndërkaq, te ne dhuratat jepen, madje, edhe haptazi dhe nuk llogariten si korrupsion…
Konkretisht, në rastin e arrestimit të kryetarit të Istogut, Haki Rugova, LDK-ja, në vend se ta mbështesë drejtësinë, e pengon atë duke e cilësuar si “arrestim politik”!
Mirëpo, fjalën e fundit për këtë rast duhet ta jep gjykata dhe tek atëherë shihet qartë se a ishte “arrestim politik” apo arrestim me shkas.
Safet Krivaça /Kosovarja/