Qielli do të dhurojë një spektakël të veçantë astronomik më 31 maj 2026, kur do të shfaqet e ashtuquajtura “Hëna Blu”, një fenomen i rrallë që ndodh njëherë në disa vite.
Pavarësisht emrit, Hëna nuk do të ketë ngjyrë blu. Termi “Blue Moon” përdoret për të përshkruar Hënën e dytë të plotë që shfaqet brenda të njëjtit muaj kalendarik.
Fenomeni është aq i pazakontë, sa ka frymëzuar edhe shprehjen e famshme angleze “once in a blue moon”, që përdoret për diçka që ndodh shumë rrallë.
Astronomët shpjegojnë se cikli normal i Hënës së plotë është rreth 29.5 ditë, ndaj vetëm në raste të veçanta një muaj arrin të ketë dy Hëna të plota.
“Hëna Blu” e 31 majit pritet të jetë e dukshme në shumë vende të botës, nëse kushtet atmosferike do të jenë të favorshme, duke u kthyer në një moment të veçantë për të apasionuarit pas qiellit dhe astronomisë.
