Takimi Kurti-Vuçiç në Bruksel ishte takim i dy liderëve për konsum të brendshëm në Kosovë e Serbi, shkruan “Kosovarja”.
Propozimi e Kurtit për ndryshimin e CEFTA-s në EFTA, as që e kishte rendin të vihej në tavolinë bisedimesh.
E, kjo ka ndodhur për ta përmendur reciprocitetin, për të cilin kryeministri i Kosovës do ta pastrojë veten nga premtimet në fushatën e fundit zgjedhore.
Ai, ndër të tjerash, nga katër pikat e propozuara, tha: “Pas njohjes reciproke me Serbinë, Kosova dhe Serbia do të përdorin masën reciproke ndaj njëra- tjetrës”.
E, nëse ndodh, siç tha Vuçiçi, se Serbia nuk do e njehë kurrë Kosovën shtet, atëherë as reciprociteti i Kurtit ndaj Serbisë nuk do të ndodhë kurrë!
Kështu, Albin Kurti e ka shmangur reciprocitetin e premtuar në Kosovë, duke e shtyrë në një reciprocitet që nuk do të ndodhë kurrë!
CEFTA, sipas Kurtit, duhet të transformohet në EFTA dhe kuptimi i saj është të menaxhohet nga BE-ja, apo të jetë projekt i BE-së.
As kjo nuk duhej të vendosej në tavolinë. Kosova ka vetëm një problem më Serbinë: Njohjen nga Serbia!
E, nëse ndodh njohja, të tjerat rehatohen vetvetiu: Hapen marrëdhëniet diplomatike dhe bilaterale, njihet legjislacioni ndërkufitar me logot e certifikuara shtetërore dhe Serbia më nuk do refuzojë të pranojë mall nga Kosova, qoftë transit apo import, duke mos e pranuar emërtimin Republika e Kosovës.
Pra, për çka po flet Albin Kurti? Kurti e di se CEFTA s’e ka rendin në Bruksel! Serbia do marrëdhënie me Kosovën, por vetëm në kuadër të një normalizimi të rremë – pa njohje reciproke.
Gjithashtu, edhe roli i SHBA-ve në bisedime me Serbinë ka qenë konstant dhe, më në fund, ambasadori Kosnet i tregoi Kurtit se çka duhet bërë me Asociacionin! Safet Krivaça /Kosovarja/