Përgatituni për një sëmundje edhe më vdekjeprurëse se coronavirusi, ka paralajmëruar kreu i Organizatës Botërore të Shëndetësisë (OBSH).
Dr. Tedros Adhanom Ghebreyesus u kërkoi vendeve të kryejnë reformat e nevojshme për t’u përgatitur për pandeminë e ardhshme gjatë asamblesë vjetore të Kombeve të Bashkuara në Gjenevë.
Në nivel global, ka pasur pothuajse shtatë milionë vdekje të shkaktuara nga sëmundja, e cila ende po merr jetë çdo ditë pasi shkalla e vaksinimit ka rënë.
Ai këmbënguli se COVID-19 është ende një kërcënim, por jo i vetmi që bota mund të duhet të përballet, raporton metro.co.uk.
Megjithë ditët më të errëta të pandemisë janë mbaruar, Dr Ghebreyesus tha se e ardhmja do të ‘trokas’.
Pas përfundimit të statusit të urgjencës globale për virusin, ai theksoi se “ne nuk mund ta heqim këtë pengesë prej rrugës. Nëse ne nuk bëjmë ndryshimet që duhen bërë, atëherë kush do t’i bëjë? Dhe nëse nuk i bëjmë tani, atëherë kur? Kur të trokasë pandemia tjetër – dhe do të ndodhë – ne duhet të jemi gati të përgjigjemi me vendosmëri, kolektivisht dhe në mënyrë të barabartë”.
Asambleja vjetore dhjetë ditore Botërore e Shëndetit, e cila përkon me 75-vjetorin e OBSH-së, është vendosur të trajtojë sfidat globale të shëndetit, duke përfshirë pandemitë e ardhshme, çrrënjosjen e poliomielitit dhe hapat për të lehtësuar urgjencën shëndetësore të Ukrainës të shkaktuar nga lufta.
194 shtetet anëtare të OBSH-së tani po hartojnë një traktat pandemik, i cili do të miratohet në asamblenë e vitit të ardhshëm.
“Një angazhim nga kjo gjeneratë (për një marrëveshje pandemike) është i rëndësishëm, sepse ky brez e di se sa i tmerrshëm mund të ishte një virus i vogël”, shtoi Ghebreyesus.
Në të njëjtin takim, vendet miratuan një buxhet prej 6.83 miliardë dollarësh për 2024-2025 – një vendim që testoi angazhimet kombëtare për rregullimin e modelit të financimit, i cili shihej si shumë i vogël dhe tepër i varur nga donatorët.
Buxheti përfshin një rritje prej 20 për qind të tarifave të detyrueshme të shteteve anëtare.
