Presidentja e Kosovës, Vjosa Osmani, ka folur pas miratimit të Rezolutës për dënimin e agresionit rus në Ukrainë, sot në Kuvendin e Kosovës.
Përmes një postimi në Facebook, Osmani ka thënë se Kuvendi i Kosovës sot foli me një zë.
“U dëshmua se përballë hegjemonive që cenojnë liritë më fundamentale njerëzore e që shkelin të drejtën e një populli për të jetuar i lirë, sovran e në përputhje me vlerat demokratike, ne gjithmonë qëndrojmë të bashkuar dhe në anën e drejtë të historisë”, ka shkruar Osmani, transmeton lajmi.net.
Ajo ka falënderuar të gjithë deputetët të cilët e fuqizuan edhe mëtej qëndrimin që tashmë e ka shprehur Kosova lidhur me dënimin e agresionit rus në Ukrainë, sanksionet ndaj Rusisë dhe hapjen e dyerve për refugjatët nga Ukraina.
“Kosova qëndron me Ukrainën, sepse Kosova qëndron në anën e lirisë”, ka përfunduar Osmani.
Postimi i plotë:
Sot, Kuvendi i Kosovës foli me një zë. U dëshmua se përballë hegjemonive që cenojnë liritë më fundamentale njerëzore e që shkelin të drejtën e një populli për të jetuar i lirë, sovran e në përputhje me vlerat demokratike, ne gjithmonë qëndrojmë të bashkuar dhe në anën e drejtë të historisë.
Falënderoj të gjithë deputetët të cilët e fuqizuan edhe mëtej qëndrimin tashmë të shprehur nga Kosova lidhur me dënimin e agresionit rus në Ukrainë, sanksionet ndaj Rusisë dhe hapjen e dyerve për refugjatët nga Ukraina.
Kosova qëndron me Ukrainën, sepse Kosova qëndron në anën e lirisë!
#WeStandWithUkraine
