Partia Demokratike e Kosovës dhe Lidhja Demokratike e Kosovës kanë paralajmëruar se nuk do ta votojnë projektligjin për buxhetin e Kosovës për vitin 2026.
Shefi i Grupit Parlamentar i PDK-së, Arian Tahiri gjatë seancës plenare për buxhetin 2026, kritikoi qeverinë për mosreflektim dhe ndryshim të këtij projektligji.
Ai tha se PDK-ja tërheq amendamentet që ka propozuar, dhe në këtë mënyrë, sipas tij, partia nuk mbështet buxhetin e këtij viti, transmeton Klankosova.tv.
“PDK edhe në diskutimin paraprak këtu në Kuvend i ka dhënë vërejtjet e veta në kuptimin profesional, teknik, por edhe në reflektimin e nevojave që i ka pasur buxheti. Ne kemi pritur që brenda dy leximeve ka me pasë reflektim dhe ka me pasë ndryshime pozitive, që buxheti të avancohet në aspekt profesional”, tha Tahiri.
Ndërsa Jehona Lushaku – Sadriu, shefe e grupit të LDK-së, ka deklaruar se nuk e votojnë buxhetin, nëse nuk shtohen 21 amendamentet e tyre.
Ajo kërkoi që amendamentet e propozuara të hidhen në votim, sepse përndryshe nuk e votojnë shqyrtimin e dytë, raporton Klankosova.tv
“Ne si grup parlamentar i kemi paraqitur 21 amendamentet dhe nuk kanë kaluar përmes komisionit për buxhet, andaj iu bëjmë thirrje t’i vëni amendamentet tona në votim, sepse besojmë që adresojnë probleme reale të qytetarëve. Përndryshe, buxhetin nuk e votojmë.” – tha Lushaku – Sadriu.
