Çka do të ndodhë pas 14 shkurtit, ditës kur do të mbahen zgjedhjet e përgjithshme? Shtetasit e Republikës së Kosovës presin reformim nga partia fituese, cilado qoftë ajo, shkruan “Kosovarja”.
Sivjet buxheti është 5% më pak se në vitin 2020. Partitë politike nuk kanë program të qartë. Kosova ka nevojë për reforma të thella…
Reformimi nuk është prioritet absolut vetëm në sferat ekonomike, por edhe në vetë segmentin e KQZ-së, ku duhet të qartësohet zgjedha e presidentit nga populli, me çka shteti shmang destabilitetin politik.
Bedri Hamza i PDK-së ka promovuar një program vjetor ekonomik, që përmban disa prioritete që prekin më shumë jetën humanitare dhe emergjente, sesa zhvillimin.
Realisht, Kosova nuk ka buxhet për ndonjë reformë apo hapje të vendeve të punës. Pasojat e pandemisë gjatë vitit 2020 kanë quar vetëm deri te mbijetesa dhe, eventualisht, stabilizimi i ekonomisë së vogël dhe të mesme.
Sa për ta aftësuar këtë sistem, që t’i jep arkës së shtetit tatime dhe profitabilitet nga doganat, nëse ato janë importuese.
Kosova nuk pritet të ketë donacione domethënëse që të përmirësojë pozitën e standardit jetësor. Priten subvencionime apo donacione të natyrës humanitare me mjete dhe nevoja emergjente, sa për ta kaluar pandeminë.
Thënë me saktë, Kosova sivjet, por edhe në vitin 2022, do të merret me sanimin e pasojave të pandemisë Covid-19.
Nëse do të ketë heqje vizash, Kosova do të përballet edhe me një krize tjetër, e ajo do jetë mungesa e fuqisë së re punëtore, e cila do të orientohet në Perëndim.
Andaj, kushdo që do jetë në krye të qeverisë së ardhshme, buxhet për reforma shtetërore nuk ka. Janë përralla premtimet për rritje pagash dhe të pensioneve 30-40%!
Janë përralla ngritja e standardit në sektorin e shëndetësisë!
Siç e dimë, gjysmëvjetori i dytë në shkolla nisi me kërcënime për greva po qe se nuk plotësohen kërkesat e SBASHK-ut…
Kosovën, po ashtu, e presin edhe trazirat sociale… Disa shtresa shoqërore, e që jetojnë me 90 euro në muaj, siç janë pensionistët, nuk vërehen se ekzistojnë ndokund…
Andaj, zgjedhjet janë i vetmi rast që pensionistët t’ua shohin fytyrat politikanëve, kur u kërkohet vota nga ta.
Populli i Kosovës sivjet është i stërmbushur me premtime, që veç kanë filluar nga politikanët tanë dhe do të zgjasin sa të zgjasë edhe fushata.
E, kur fushata zgjedhore të përfundojë, përsëri populli do e këndojë këngën e vjetër… Do jetojë ashtu siç jeton edhe tash, në skamje e varfëri…
Qofsha i gabuar! Safet Krivaça /Kosovarja/
