Vdekshmëria në Kosovë, me pandeminë Covid-19, po cilësohet “bilanc lufte”! Ka disa javë që Kosovën e ka pllakosur zia e pashpallur, me humbje jetësh të mbi 30 njerëzve në ditë, në mesin e të cilëve edhe të rinj, shkruan “Kosovarja”.
Kosova ka marrë vëmendjen negative nga gjithë bota për humbje jetësh nga Covid-19, duke qenë e para në botë me vdekje për kokë banori.
Arsyeja dihet: mosmenaxhimi i pandemisë dhe lirimi i tepruar i masave, për të cilat përgjegjësia i faturohet Qeverisë, kryesisht Kurtit.
Shifrat me mesatare 30 të vdekur në ditë, janë tepër për një vend me 1 milion e 800 mijë banorë rezidentë siç është Kosova.
Por, habit fakti se askush nuk është kah i bën dert shifrat me kaq shumë të vdekur brenda dite në Kosovë!
Për më keq, po akuzohet Qeveria se nuk është duke dhënë numrin e saktë të viktimave nga Covid-19. Kryetari Komunal i Vushtrrisë, Xhafer Tahiri, ka deklaruar se do ta përmbushë me fakte deklaratën e vet se qeveria po e fsheh numrin e viktimave nga Covid-19.
Ai tha se nëse prokuroria e shtetit do ia kërkojë, do dëshmojë me emra dhe mbiemra të vdekurit nga Covid-19, e që nuk janë deklaruar nga shteti as si emra e as si numra.
Veç kësaj, në Kosovë ka edhe shumë viktima që ndodhin nga aksidentet e shumta në trafik, madje thuaja se çdo ditë…
Pse mbajnë armë politikanët tanë?
Rasti i fundit në Pejë, ku dy të rinj politikanë u vranë ndërmjet veti me shkrepje armësh, është ndër më tragjikët në Kosovë.
Sidoqoftë, është thënë shpesh se politika zyrtare në Kosovë ka edhe parapolitikë ku sundojnë armët. E shumë politikanë, jo rrallë, janë zënë me armë në dorë.
Është raportuar për shumë zyrtarë që kanë ndikim direkt në jetën institucionale të Kosovës se i shfaqin armët në dasma e ahengje për të festuar me armë e jo me zemër.
Shtrohet pyetja: A është dënuar ndokush për armëmbajtje pa leje, apo rrezikim të rendit publik nën zbrazje armësh? Përgjigja është e thjeshtë: Nuk mban mend kush!
Në Shqipëri, gjithashtu, vrasjet e përditshme me armë janë të pranishme dhe janë bërë dukuri. Atje në vit ndodhin me mijëra viktima, si pasojë e vrasjeve, aksidenteve, hakmarrjeve dhe papërgjegjësive të shumta.
E, kur është fjala për vdekjet, ditë më parë 14 sosh ndodhën edhe në Spitalin e Tetovës nga flaka që i përfshiu…
Andaj, habitet njeri se çka po ndodh me ne, shqiptarët! Safet Krivaça /Kosovarja/
