Punëtori 59-vjeçar vdes pasi bie nga kati i gjashtë i objektit në ndërtim

Një ngjarje tragjike është raportuar sot në rrugën “Remzi Hoxha” në Ferizaj, ku një punëtor ka humbur jetën pas rënies nga një objekt në ndërtim.

Rastin për Sinjalin e ka konfirmuar zëdhënësi i policisë për rajonin e Ferizajt, Kanun Veseli, duke bërë të ditur se viktima, rreth 59-vjeçar, dyshohet se ka rënë nga kati i gjashtë i ndërtesës gjatë punimeve.

Në vendin e ngjarjes kanë dalë njësitet policore, ekipet emergjente, forenzika rajonale si dhe inspektorët e punës, ndërsa është bërë sigurimi i zonës dhe kanë nisur hetimet për sqarimin e rrethanave të rastit.