Ronela Hajati ndodhet aktualisht në Barcelonë ku do të marrë pjesë në një festë të Eurovision-it.
Këngëtarja e cila do të përfaqësojë Shqipërinë me këngën “Sekret”është përballur së fundmi me një mori komentesh negative sa i takon peshës trupore, që në fakt janë krejtësisht të panevojshme kur ajo që duhet të na interesojë ne te Ronela aktualisht është zëri.
Dhe që të jemi të sinqertë kënga është yll, realizimi është fantastik dhe zëri i Ronelës është në nivelet e duhura për të na nxjerrë dinjitoz në arenën ndërkombëtare.
“Në një anë këtu kemi njerëz që e dinë këngën përmendësh, të sjellshëm, gazetarë shumë funny, të kujdesshëm dhe nga ana tjetër kemi popullin tim shqiptar suportues që janë të gjithë nutricionistë dhe përveçse për ta jam “lopë”, “balenë” vazhdojnë me dilemat se si një këngëtare që performon mund të dojë “një njeri që lexon”, – shkroi Ronela në Instastory.
Kujtojmë këtu batutën e Ronelës në Top Show ku ajo tha se nuk ka takuar asnjë djalë që lexon libra dhe kjo për të është shqetësuese.
Disa herë këngëtarja është përballur me situata të tilla për shkak të peshës, por sigurisht për të diçka kaq sipërfaqësore nuk mund të jetë problematike.
Ajo që presim me padurim është performanca e saj në Eurovision, që Ronela ka premtuar të jetë diçka që nuk e kemi parë kurrë më parë.