Tornado është një nga fenomenet më të rrezikshme atmosferike, i cili formohet gjatë stuhive të fuqishme kur ajri i ngrohtë dhe i lagësht përplaset me ajrin e ftohtë dhe të thatë.
Procesi nis me krijimin e një stuhie të fuqishme, ndërsa ndryshimet e mëdha në drejtimin dhe shpejtësinë e erës në lartësi krijojnë një rrotullim të ajrit. Ky rrotullim forcohet brenda stuhisë dhe shndërrohet në një kolonë vertikale ajri. Kur formohet një re në formë hinke që zbret deri në tokë, krijohet tornado.
Tornadot shoqërohen me erëra jashtëzakonisht të forta, të cilat në rastet më ekstreme mund të kalojnë shpejtësinë prej 300 kilometra në orë, duke shkaktuar dëme të mëdha në ndërtesa, automjete dhe infrastrukturë.
Fenomeni është më i zakonshëm në Shtetet e Bashkuara të Amerikës, veçanërisht në zonën e njohur si “Tornado Alley”, që përfshin shtete si Teksasi, Oklahoma, Kansas dhe Nebraska. Megjithatë, tornado mund të ndodhin edhe në Kanada, Argjentinë, Brazil, Bangladesh, Afrikën e Jugut, si dhe në disa vende të Evropës, përfshirë Gjermaninë, Italinë, Francën, Poloninë dhe Mbretërinë e Bashkuar.
Në Ballkan, përfshirë Kosovën, tornadot janë shumë të rralla. Megjithatë, gjatë stuhive të forta mund të krijohen vorbulla ajri ose tornado me intensitet të ulët, të cilat zakonisht kanë jetëgjatësi të shkurtër dhe prekin zona të kufizuara.
