Zgjedhjet e fundit lokale kanë treguar se “Vetëvendosja” është në rënie e sipër dhe parashikimet e anketat nuk japin shpresë për partinë e Kurtit.
Cilat janë disa nga shkaqet pse VV-ja nuk është brenda frymës triumfuese, sikur që ishte në zgjedhjet e fundit nacionale?
I pari i VV-së, Albin Kurti, vazhdimisht, thirret në ndasinë “ne”dhe “ata”! E, kjo maksimë përçarëse flet se Kurti po krijon frymë përçarëse në popull, ashtu sikur nuk ndodh askund në botë që brenda një kombi, një burrështetas, e që e ka portofolin e shtetit, e ndanë popullin në dysh.
Pse tha Albin Kurti se “në zgjedhjet lokale u rreshtuan të gjithë kundër tij”?
Përgjigja është e thjeshtë: Njëjtë sikur ishte 20 vjet Kurti kundër të gjithëve!
Populli e ka votuar Kurtin për të parin e qeverisë pas shumë premtimeve të bëra për ndryshime rrënjësore në qeverisje. Dhe, çka ndodhi?
Në vend se ta ndryshojë gjendjen e premtuar, ka ndryshuar vetë Albin Kurti!
Premtonte punësim, e punësim nuk ka. Premtonte rritje pagash, e, në fakt, nën qeverisjen e tij deri më tash ka degraduar standardi jetësor për rreth 30%!
Premtonte aftësim të ndërmarrjeve publike, e ai i varfëroi edhe më shumë ato!
Andaj, siç shihet, të gjitha premtimet e Kurtit kanë qenë të motivuara politikisht për hakmarrje, kryesisht ndaj Hashim Thaçit e Isa Mustafës.
Mbi politikat lincuese Kurti arriti ta përçajë LDK-në, duke i marrë në taborin e vet disa figura të njohura të kësaj partie.
Një dukuri tjetër është se në VV kanë aderuar gjithë të pakënaqurit në partitë tjera, kundërshtarë politikë në partinë ku edhe i kanë marrë hapat e parë.
Konkretisht, një nga ato figura është Donika Gërvalla, ish-LDK-iste. Pastaj, Mimoza Kusari Lila, e cila dikur përbehej në kokën e Begjet Pacollit, i cili e përkrahu dhe e bëri kjo që është tash, e që më vonë ajo ia ktheu shpinën tërësisht, madje edhe duke e përbuzur.
Një tjetër, e që tash është aktiv në VV është Ismail Kurteshi, pastaj Hydajet Hyseni, që të dy nga Gjilani, ish-aktivistë të njohur të LDK-së.
Por, nuk janë vetëm këta. Ka edhe shumë të tjerë që dikur kanë qenë aktivë në partitë tjera, e tash janë në VV.
Shtrohet pyetja: Çka pritet nga ata, të cilët, kalojnë brenda natës nga partia në parti? Safet Krivaça /Kosovarja/
