Një ngjarje tragjike ka ndodhur pasditen e së premtes në fshatin Labinot-Fushë të Elbasanit, ku dy vëllezër të mitur kanë humbur jetën pasi janë mbytur në lumin Shkumbin.
Sipas informacioneve paraprake, vëllezërit, të moshës 7 dhe 9 vjeç, kishin dalë për të ruajtur bagëtitë dhe më pas janë futur në ujërat e lumit, ku dyshohet se janë mbytur, shkruan euronews.
Ende nuk dihen rrethanat e plota të ngjarjes por Policia e Elbasanit ndodhet në vendngjarje dhe po punon për të zbardhur shkaqet e kësaj tragjedie.
Njoftimi i policisë
“Në fshatin Labinot Fushë, dyshohet se janë mbytur aksidentalisht në lumin Shkumbin dy fëmijë të moshës 7 dhe 9 vjeç (vëllezër).
Trupat e pajetë po transportohen për ekspertizë mjeko-ligjore.
Grupi hetimor dhe shërbimet e Policisë ndodhen në vendngjarje dhe vijojnë punën për sqarimin e plotë të rrethanave”, thuhet në njoftim./euronews
