Presidenti i Shteteve të Bashkuara, Donald Trump, ka deklaruar se Irani është i interesuar të arrijë një marrëveshje me Uashingtonin, duke theksuar se një marrëveshje e tillë do të ishte në interes të të dyja palëve.
Sipas tij, Teherani “vërtet dëshiron të bëjë një marrëveshje”, duke lënë të hapur mundësinë për vazhdimin e dialogut diplomatik mes dy vendeve, pavarësisht tensioneve të fundit.
Deklaratat e Trump vijnë në një periudhë të ndjeshme, pas raportimeve për sulme të ndërsjella ushtarake mes forcave amerikane dhe atyre iraniane gjatë fundjavës.
Ushtria amerikane ka njoftuar më herët se ka goditur disa objektiva në Iran, ndërsa Garda Revolucionare iraniane ka deklaruar se ka reaguar duke shënjestruar një bazë amerikane në rajon.
Pavarësisht përshkallëzimit të situatës, raportime ndërkombëtare sugjerojnë se po vazhdojnë përpjekjet diplomatike për uljen e tensioneve dhe arritjen e një marrëveshjeje të mundshme mes dy vendeve.
