Kompania Rajonale e Ujësjellësit “Prishtina”, ka njoftuar të enjten se si shkak i reshjeve të dendura atmosferike në afërsi dhe rreth liqenit të Ujmanit ka ngritje të turbullirës së ujit në kanalin e Ibër Lepencit.
Sipas njoftimit, impianti i trajtimit të ujit në Shkabaj dhe Drenas, nuk ka mundësi teknike të trajtojnë ujin për pije.
Si pasojë e kësaj, Fushë Kosova së bashku me Zonën Industriale, lagjja Kalabria, Obiliqi do të kenë redukime të ujit duke filluar sot nga ora 10: 00 dhe do zgjasë deri në 16:00.
“Pastaj ujë do të keni nga ora 16:00- 20:00, pastaj reduktim nga ora 20:00-04:00 të mëngjesit. Në pozitë më të rënduar e kemi komunën e Drenasit, por autobotët/autocisternat do jenë aty për t’i furnizuar qytetarët me ujë”, thuhet në komunikatën për media.
Po ashtu edhe në Fushë Kosovë bëhet e ditur se në kohën e reduktimit do të vendosen autobot për furnizim me ujë deri në tejkalimin e situatës.
“Fshatrat e Podujevës do të reduktohen gjatë ditës diku rreth 3 orë. Një situatë e tillë vazhdon deri në përmirësimin e situatës me turbullirë në kanal. Mbeteni të njoftuar deri në vendimin e radhës, varësisht nga situata me reshje atmosferike”, thuhet tutje.
