Një 34-vjeçar ka humbur jetën si pasojë e lëndimeve të marra gjatë punimeve në një ndërtesë në lagjen “Bajram Curri” në Prizren.
Lajmi është konfirmuar për nga zëdhënësi i policisë rajonale të Prizrenit, Shaqir Bytyqi.
Ai ka bërë të ditur se rasti ka ndodhur rreth orës 13:30 kur F.A. (34) nga fshati Caravik i Malishevës, ka rënë nga skelet e një ndërtese.
Viktima është dërguar në Emergjencën e Spitalit Rajonal të Prizrenit në gjendje të rëndë, prej nga është transportuar në QKUK Prishtinë, ku edhe ka ndërruar jetë rreth orës 16:30.
Në lidhje me rastin, i dyshuari N.B., pronar i kompanisë ndërtimore, pas intervistimit me vendim të Prokurorit të Shtetit është ndaluar për 48 orë, si i dyshuar për veprën penale asgjësimi, dëmtimi apo heqja e pajisjeve dhe rrezikimi në vendin e punës.
Policia e Kosovës në bashkëpunim me Prokurorinë e Shtetit, Inspektoratin e Punës dhe njësitë kompetente hetimore, po ndërmarrin veprimet e nevojshme për sqarimin e plotë të rrethanave të rastit.
