Sipas një organizate të bamirësisë, mbi një milion britanikë janë të prekur nga mungesa e ushqimit në kohën e karantinës për shkak të koronavirusit.
Rreth 1.5 milion njerëz kanë raportuar se e kalojnë tërë ditën pa ngrënë që nga marrja e masave të izolimit para tri javëve për shkak të mungesës së ushqimit në dollapët dhe frigoriferët e tyre.
Sipas të dhënave të organizatës “YouGov”, gjashtë për qind e popullsisë britanike – më shumë se tre milionë njerëz – e kanë pasur dikë në shtëpi që nuk ka ngrënë darkë shkaku i ushqimit të pamjaftueshëm.
Për më tepër, në këtë hulumtim thuhet se mbi një milion njerëz kanë deklaruar se i kanë humbur të gjitha të ardhurat si rezultat i izolimit të vendit, shkruan “Daily Mail”, transmeton Gazeta Express.
Kjo organizatë ka bërë thirrje që qeveria të ofrojë më shumë përkrahje për përmirësimin e skemave të ndihmave sociale dhe të ofrojë pako ushqimore për personat e vetizoluar.
Autoritetet lokale i kanë shtuar përpjekjet për t’i ndihmuar njerëzit e prekur nga masat. Këshili i Qytetit të Liverpulit i ka shtuar për 150 për qind grantet emergjente për njerëzit pa ushqim dhe pa para në mënyrë që ata të kenë mundësi t’i paguajnë faturat.