Stina e ngrohtë na fton të eksperimentojmë me nuanca të papritura, të theksuara dhe të ngrohta. Njëra që bie më shumë në sy? Jeshili petrol. Elegant dhe i sofistikuar, ky tonalitet i thellë – rezultat i përzierjes mes jeshilit smerald dhe blu ottanio – është perfekt edhe për evente formale, falë karakterit të tij të rafinuar.
Ndër prirjet më të spikatura të modës për pranverë-verë 2025, dallohen veshjet elegante në ngjyrë jeshil petrol, të cilat po shfaqen si aleatë të çmuar për ceremonitë dhe ngjarjet e veçanta.
Elegantë nga natyra dhe të lehtë për t’u veshur, këta fustane përfaqësojnë shijen e mirë: të guximshëm pa teprim, të përshtatshëm si për ditën ashtu edhe për mbrëmjen, ata konfirmohen si “must-have” i sezonit.
Nga pasarelat te stilimi i rrugës
Sfilatat e koleksioneve pranverë-verë 2025 tregojnë shumë për shumëllojshmërinë që ofron kjo ngjyrë. Acne Studios dhe Lacoste e paraqesin në versione të përditshme: shtëpia suedeze propozon një fustan të shkurtër me skaje të parregullta, ndërsa marka franceze ofron një fustan polo me stil sportiv-elegant. Dy qasje të ndryshme, të bashkuara nga fuqia e së njëjtës ngjyrë magnetike.
Nga ana tjetër, Schiaparelli dhe Naeem Khan i japin këtij tonaliteti një shije më ekstravagante: i pari me fustan me efekt metalik, i dyti me paillettes ndriçuese – të dy idealë për netët më të veçanta.
Aksesuarët kompletojnë pamjen: që nga setet elegante në ar apo argjend, deri te çantat me shije të hollë, detajet janë ato që bëjnë diferencën.
Si t kombinoni veshjet në jeshil petrol
Stili urban e konfirmon: aksesorët janë aleatët më të mirë të fustanit në jeshil petrol. Modelet e ditës, të shkurtra dhe më pak formale, kombinohen shkëlqyeshëm me syze dielli me xhama të errët, që i japin pamjes një prekje “divash”, dhe me bizhuteri të theksuara, për një efekt të rafinuar.
Kur vjen puna te këpucët, nuancat e kafesë janë zgjedhja ideale – veçanërisht çizmet e gjata deri në gju, që krijojnë një kontrast tërheqës me jeshilin petrol.
Për mbrëmje, dominon fustani i gjatë në këtë ngjyrë. I realizuar në crêpe de chine ose saten, ai ofron menjëherë një efekt glamur. Për një pamje të plotë, shtoni rripa të hollë, bizhuteri elegante, çanta të vogla dorë dhe taka delikate.
Modelet më “CHIC” të sezonit
Mjafton një fustan në jeshil petrol për t’i shtuar një dozë feminiteti dhe elegance garderobës. Markat si Rinascimento dhe Ulla Johnson e sjellin këtë ngjyrë në kombinim me stofin e rrasët, duke krijuar modele të plisetuara dhe të gjithanshme, perfekte edhe për ditën.
Zara dhe Christopher Esber fokusohen te fustanet e gjata me drapime, qëndisje dhe prerje asimetrike, ndërsa Azazie sugjeron versione ideale për dasmat dhe ceremonitë e sezonit.
Retrofête, nga ana tjetër, guxon me një mini fustan me fund të valëzuar dhe reflektime metalike, për një stil që nuk kalon pa u vënë re.
