Qysh në ditën e parë të punës, kryeministri Avdullah Hoti bëri homazhe te varri i Presidentit Rugova, homazhe në varrezat e Jasharajve në Prekaz dhe u zotua se kompleksi memorial do të jetë nën përkujdesje të qeverisë, premtoi 1.2 miliard euro për rimëkëmbjen ekonomike, si dhe ndau një ndihmë materiale për të riun nga Gjilani, e që vdiq tragjikisht në Konviktin e Studentëve në Prishtinë, shkruan “Kosovarja”.
Andaj, nëse është e vërtetë se dita e mirë shihet që në mëngjes, del se edhe Qeveria Hoti është në rrugë të mbarë.
Megjithatë, dy sfida të rënda e presin urgjentisht qeverinë e Hotit, pa dashur të paragjykohet suksesi apo dështimi i saj…
Është menaxhimi ekonomik i vendit në kuptimin e shpëtimit të sektorit privat, për të cilin Avdullah Hoti premtoi para se të bëhej kryeministër. E, pakoja fiskale për këtë qëllim kapë shumën 1.2 miliardë euro.
Qeveria Hoti, ashtu si cilado qeveri që do të ishte aktualisht, nuk ka mundësi të projektojë investime programore sivjet, sepse jemi në një zonë të kuqe pandemie, e cila sivjet do të mjaftohej me mbijetesën e sektorëve prodhues, e që përfshinë shumicën e popullatës së punësuar.
Të kujtojmë se qeveria Kurti nuk e përfilli propozimin e Bedri Hamzës, për të vënë në funksion një pako fiskale për shpëtimin e ekonomisë së vendit, e që fillimisht mendohej të ishte 370 milionë euro.
Sfida e dytë për qeverinë Hoti është marrëveshja Kosovë-Serbi, e cila do të paraprihet nga bisedimet.
Serbia e ka lavdëruar presidentin amerikan, Trampin, se ai nuk e llogaritë Kosovën si punë të kryer, me çka lë të kuptohet se problemi i Kosovës është i hapur.
Andaj, qeveria Hoti duhet ta shfrytëzojë maksimalisht vendimin e Gjykatës së Hagës për të drejtën e shpalljes së pavarësisë së Kosovës, e cila është në përputhje me të drejtën ndërkombëtare. Dhe, me këtë fakt edhe të prezantohet para ndërmjetësuesit të SHBA-ve, Grenell, si dhe të atij të BE-së, Lajçak.
BE-ja, aktualisht, e ka një disponim të bisedimeve që nuk do të preken kufijtë. Megjithatë, bisedimet llogaritet të jenë të rënda dhe të mundimshme…
Andaj, nëse eventualisht qeveria Hoti do të dështojë në arritjen e një marrëveshje Kosovë-Serbi, nuk do e arsyetojë vetveten në pushtet.
Sidoqoftë, marrëveshja është e mundshme, meqë Serbia e di se nuk mund të bëhet anëtare e BE-së pa e zgjidhur problemin e Kosovës.
E, në anën tjetër, hapja e “Kutisë së pandorës”, me ndryshim kufijsh, rrezikon sigurinë e Ballkanit e më gjerë.
Por, për një marrëveshje të dobishme, qeveria Hoti duhet ta ketë përkrahjen dhe praninë e të gjithë liderëve politikë të Kosovës, pa u lënë anash as VV-ja, e që nuk besojmë se do të bëhet pjesë e ekipit bisedues, shkaku i inateve partiake. Safet Krivaça /Kosovarja/
