Julian Zyrakja ka lindur në vitin 1978 në Elbasan dhe që kur hapi sytë jeta nuk u tregua bujare me të. Babai biologjik nuk e pranoi si fëmijën e tij, përkundrazi e braktisi për shkak se ai lindi me epilepsi. Refuzimi i të atit do të pasohej me shumë peripeci të tjera gjatë fëmijërisë si mohimi dhe bullizimi nga shokët e klasës që i grisnin librat, madje në disa raste edhe i gjuanin me gurë pasi ai ishte ndryshe.
Mirëpo pas martesës të së ëmës, gjërat ndryshuan për Julin i cili shumë shpejt gjeti një baba të vërtetë që e donte me shpirt dhe u kujdes për të në çdo moment. Për fat të keq ai ndërroi jetë, por Juli nuk harroi kurrë dashurinë e tij dhe ka vendosur të realizonte një nga amanetet e tij. Ai është 45 vjeç dhe vjet është ulur për herë të parë në bankat e shkollës së mesme. Ai tregoi se studion deri në orët e vona të mbrëmjes dhe dëshira e tij më e madhe është të vazhdojë universitetin dhe të krijojë një familje.
I ftuar ditën e djeshme në emisionin “Ftesë në 5” ai ka bërë një rrëfim tejet të ndjeshëm për veten. Momenti më i dhimshëm për të ishte vdekja e së ëmës, e cila nuk mundi të fitonte luftën me Covid-in.
“I druhesha shumë mamit natën. Zgjohesha, i jepja mëngjesin, I blija ushqimet më të mira. Kisha një kujdes special për të, por ma mori Koronavirusi. Covidi hyri fshurazi në shtëpinë timë. Ne ishim vaksinuar, ajo me dy doza Phizer, kursë unë me dy doza SinoVac. Kjo sëmundje e mallkuar më mori njeriun më të dashur të zemrës”, tha i prekur ai, ndërsa as Bieta Sulo s’ mundi t’i mbante lotët.
