Kandidati i PDK-së për kryeministër, Bedri Hamza, ka udhëtuar drejt Hagës për të vizituar ish-krerët e UÇK-së dhe ish-bashkëpartiakët e tij, Hashim Thaçi dhe Kadri Veseli, të cilët ndodhen në paraburgim në Dhomat e Specializuara të Kosovës.
Përmes një postimi në Facebook, Hamza bëri të ditur se gjatë vizitës i ka gjetur Thaçin dhe Veselin “të fortë” dhe i ka lënë “me plot shpresë”.
“Edhe një herë në Hagë për t’i vizituar presidentin Thaçi dhe kryetarin Veseli. I gjeta të fortë dhe i lashë me plot shpresë se e vërteta e luftës sonë çlirimtare së shpejti do të triumfojë,” shkroi Hamza.
Ai shtoi se qëndrueshmëria dhe besimi i tyre në drejtësi, në Kosovë dhe në aleatët ndërkombëtarë, mbeten një burim frymëzimi për të gjithë.
“E vërteta historike, ajo që populli ynë e ka përjetuar, padyshim se do të rikonfirmohet edhe në Hagë,” theksoi ai më tej.
Hamza shprehu bindjen se rikthimi i tyre në Kosovë është çështje kohe: “Kosova, me padurim, tanimë është duke i numëruar javët dhe ditët e rikthimit të tyre, me bashkëluftëtarët e tyre, në mesin tonë.”
