Bekim Ibrahimi është këngëtari e instrumentisti shumë dimensional, që në kohën e luftës sjelli hitin “UÇK thërret Kosova”, këngë kjo që u bë tejet e dëgjuar asaj kohe.
Këngëtari që i bie pianos, keyboard,harmonikes e çiftelisë, ka nisur të merret me muzikë që në fëmijëri, me ç’rast është paraqitur edhe në koncerte e festivale, shkruan Kosovarja.
Me zhvendosjen e tij në Zvicër, Bekim Ibrahimi u orientua në tregun e dasmave dhe ahengjeve, ku angazhimi e kërkesat nuk i munguan asnjëherë.
Ndër vite, këngëtari ka lansuar tri albume me bashkëpunëtor të listës A, si Naim Gjoshi, Agim Doci, Ymer e Dardan Shkreli, etj.
Bekim Ibrahimi prej pak kohësh ka pauzuar nga muzika, kjo për shkak të angazhimit të tij në biznesin personal në Zvicër, që është një lokal ku shiten vegla muzikore profesionale, e ku klientela është elitare dhe vjen nga e gjithë Evropa, e madje edhe Amerika.
Ndërkohë, pandemia e shkaktuar për shkak të virusit Covid 19-të, që e ka gjunjëzuar botën, e ka prekur pa dyshim edhe fushën e artit.
Artisti gjilanas nga Prishtina, por që jeton prej vitesh në Zvicër, ku ka edhe një dyqan instrumentesh muzikore, ka vendosur që me rastin e pandemisë, të krijoi një shfaqje unike, e cila ka marrë mjaftë vëmendje.
Duke dashur të tregoj se koronavirusi ka prekur gjithçka, e madje edhe muzikën, ai i ka vënë flakën një violonçeli, duke e konsideruar simbolikisht si “të prekur nga koronavirusi”.
Pas diegjes publike, Bekim Ibrahimi e ka rikthyer sërish në jetë këtë instrument muzikor fisnik, ama në trajtën e skulpturës. Ideja e tij është konceptuale dhe e thellë njëkohësisht, me ç’rast edhe përçon mesazh.
Këngëtari, instrumentisti e biznesmeni shqiptar, metaforikisht thotë se me të koronavirusi nuk ka punë, pasi ai është vetë Covid 19.
Ibrahimi, i porosit të gjithë për kujdes, por pa panikë./Kosovarja/