Tendenca serbe për nxitje të urrejtjes ndërfetare në Kosovë nuk është e re. Ajo është përdorur edhe nga UDB-a e Serbisë para shumë dekadash. Por, shqiptarët nuk janë përçarë asnjëherë në aspektin kombëtar, shkruan “Kosovarja”.
Pas akuzës së Gjykatës Speciale në Hagë se UÇK-ja ka bërë “vrasjen e katolikëve”, kanë reaguar shqiptarët e besimit katolikë, të cilët kanë pohuar bindshëm se kanë qenë edhe vetë në UÇK-së dhe se s’kanë pasur kërcënime për vrasje nga askush.
Kështu, personalitete të shquara nga besimi katolik, kanë hedhur poshtë akuzat e Gjykatës Speciale, duke i quajtur ato shpifje të Beogradit.
Sidoqoftë, shqiptarët janë populli më tolerant në botë në aspektin fetar. Gjatë historisë shqiptarët kurrë nuk janë ndarë sipas besimit fetar.
Edhe në luftë, edhe në paqe, shqiptarët kanë qenë një komb dhe kanë pasur të njëjtët armiq dhe të njëjtët miq.
Serbia nuk i ka falë shqiptarët katolikë, por i ka masakruar njëjtë si edhe shqiptarët myslimanë.
Andaj, Gjykata Speciale në Hagë ka rënë viktimë e Beogradit, kur e ka dhënë në aktakuzë një shpifje të tillë, e që jep qartë të kuptohet se pas atyre akuzave qëndron pikërisht Serbia.
Se ka dëshmi se shqiptarët janë masakruar njëjtë dhe pa dallim nga Serbia gjatë luftës më 1998-1999, më së miri tregon rasti i masakrës në fshatin Meje të Gjakovës, ku edhe ndodhet varreza e vetme në botë me myslimanë e katolikë bashkë.
Dhe, që nga atëherë, e edhe tash, ceremonitë fetare në varrezën e Mejes bëhen si nga shqiptarët e besimit myslimanë, po ashtu, edhe nga ata katolikë.
Prandaj, Kosova është ndër vendet e rralla në botë ku krerët fetarë, si të besimit islam ashtu edhe ata katolik, i vizitojnë bashkërisht selitë e shenjta, për festat e krishtlindjeve dhe Bajramin.
Kosova është rast unik në botë, ku edhe sot, po në të njëjtën shtëpi, jeton një familje me dy fe: myslimane e katolike.
Konkretisht, në fshatin Brus të Lipjanit janë dy vëllezër, ku njëri është i besimit mysliman e tjetri i besimit katolik.
Raste të tilla kemi edhe në komunën e Deçanit dhe në atë të Gjakovës. E, kjo të jep të kuptosh se toleranca fetare te shqiptarët është shumë e madhe.
Prandaj, kjo veç sa ia rritë namin Kosovës dhe assesi nuk e degradon. Safet Krivaça /Kosovarja/